ការអប់រំនៅជនបទខេត្តក្រចេះត្រូវបានប្រជាពលរដ្ឋឲ្យដឹងថា មានការលំបាកដោយសារតែគ្រូមិនបានបង្រៀនតាមកម្មវិធីត្រឹមត្រូវដែលជាហេតុធ្វើឲ្យសិស្សមានការនឿយណាយសាលា។ ការសិក្សានៅភូមិអូរព្រះ ឃុំអូរក្រៀង ស្រុកសម្បូណ៌ ខេត្តក្រចេះ ត្រូវបានអ្នកស្រុកឲ្យដឹងថា ការបង្រៀននិងការរៀនមានភាពរប៉ាត់រប៉ាយដោយគ្រូគ្មានលំនឹងក្នុងការបង្រៀន។
លោក ម៉ោញ សំ ប្រធានសហគមន៍បានលើកឡើងពីផលលំបាកក្នុងការផ្តល់កូនឲ្យទៅរៀនថា ការឈប់មិនបានប្រាប់សិស្សឲ្យដឹងថា ឈប់ប៉ុន្មានថ្ងៃហើយពេលចូលរៀនក៏មិនបានប្រាប់ថ្ងៃកំណត់ដោយពឹងមេភូមិឬសហគមន៍ឲ្យជួយប្រមូលក្មេងតាមផ្ទះ។
លោក ម៉ោញ សំ បានឲ្យដឹងថា ៖ «បួនប្រាំថ្ងៃទៅបានឃើញមកហៅសិស្សមួយសាទៀតទៅ។ សិស្សបើវាញយៗពេកទៅវាណាយចិត្ត។ បង្រៀនរបៀបអ៊ីចឹងអត់ចេះទេ»។
គោលបំណងរបស់អ្នកស្រុកគឺចង់ឲ្យមានការបណ្តុះបណ្តាលកូនឲ្យមានការចេះដឹងខ្ពស់ដើម្បីចៀសផុតពីការរស់នៅដោយគ្រាន់តែគាស់កាយព្រះធរណីដូចពួកគាត់រហូតបែបនេះ ប៉ុន្តែលោកក៏សំណូមពរសុំឲ្យមានការផ្តល់ប្រាក់បៀវត្សរ៍ដល់គ្រូបង្រៀនឲ្យបានគ្រប់គ្រាន់ផងដែរដើម្បីកាត់បន្ថយការបោះបង់សាលាជាញឹកញាប់ពីសំណាក់គ្រូបង្រៀនទៅប្រកបរបរផ្សេង។
លោក ម៉ោញ សំ បានបញ្ជាក់ថា ៖ «យកអ្នកពីចម្ងាយមកបង្រៀន មកបានមួយឆ្នាំ អាឡេអាឡោទៅផ្ទះផងទៅអីផង ដល់អ៊ីចឹងរៀនដាច់ដោច។ ក្មេងវាថា ទៅមិនដឹងអី មិនដឹងរៀនមិនដឹងសូត្រ»។
នាយកសាលអូរព្រះ គឺលោក ភិរម្យ បានជម្រាបថា ផលលំបាកកើតមានទាំងសងខាង គ្រូឈប់មុនថ្ងៃកំណត់ ឯសិស្សចោលសាលាទៅជួយការងារឪពុកម្តាយក្នុងពេលកំពុងសិក្សា។
លោក ភិរម្យ បានមានប្រសាសន៍ថា ៖ «ផលលំបាក បញ្ហាគ្រូហើយនិងសិស្ស។ គ្រូមកមិនទាន់ដល់ថ្ងៃកំណត់ទៅផ្ទះវិញ មកមិនទាន់បានពាក់កណ្ដាលខែ៦ផង ទៅផ្ទះវិញ។ មួយទៀត សិស្សខែនេះដល់រដូវស្ទូងឈប់អស់ សុំទៅស្ទូង។ ទម្រាំរួចស្ទូងហួសពេលហើយ»។
នាយកមន្ទីរអប់រំខេត្ត គឺលោក ឡាយ បូរ៉ា បានជម្រាបថា ដោយផលលំបាកមានទាំងសងខាងបែបនេះ លោកសំណូមពរឲ្យមាតាបិតាជំរុញកូនឲ្យមករៀន ដោយកុំទុកកូនប្រើក្នុងផលប្រយោជន៍ផ្ទាល់ខ្លួន ឯគ្រូវិញលោកនឹងប្រើវិន័យរដ្ឋបាល។
លោក ឡាយ បូរ៉ា បានថ្លែងថា ៖ «បើបានបងឲ្យព័ត៌មានអ៊ីចឹង អត់យកចំណុចសំខាន់ទេ យើងត្រូវតែឲ្យសាលារៀនបើកទ្វារ។ គ្រូមិនអាចថា អ្នកឯងចង់ទៅមួយខែ ឈប់មួយខែ ទៅមួយថ្ងៃ ឈប់មួយថ្ងៃបានទេ សម័យខ្ញុំឥឡូវ ខ្ញុំកំពុងតែស្រាវជ្រាវហើយ។ ឥឡូវមួយចំនួនខ្ញុំកំពុងតែតាមហើយ ហើយបើមិនកើតទេ ខ្ញុំមានវិធានការរដ្ឋបាល»។
សាលារៀនអូរព្រះស្ថិតនៅតាមដងផ្លូវជាតិលេខ៧មានចម្ងាយប្រមាណ១០០គីឡូម៉ែត្រពីទីរួមខេត្តក្រចេះ ដែលនៅទីនោះមានទាំងគ្រូក្របខ័ណ្ខនិងគ្រូកិច្ចសន្យាចំនួន៤នាក់ ហើយមានសិស្សរៀនប្រមាណជិត១០០នាក់ជាតំបន់ខ្សត់ធនធានមនុស្ស៕
From:
ไม่มีความคิดเห็น:
แสดงความคิดเห็น