អ្នកតំណាងរាស្រ្តមណ្ឌលខេត្តកំពត លោកស្រី មូរ សុខហួរ កំពុងរង់ចាំការឆ្លើយតបពីតុលាការក្នុងការសម្រេចយកមេធាវីថ្មីមក ការពារក្ដីជំនួសមេធាវីចាស់។ លោកស្រី មូរ សុខហួរ អ្នកតំណាងរាស្រ្តមណ្ឌលខេត្តកំពតនិងជាសមាជិកគណៈកម្មការនាយកនិង គណៈកម្មការអចិន្ត្រៃយ៍នៃគណបក្សសមរង្ស៊ី មានប្រសាសន៍ពីខែត្រកំពត ប្រទេសកម្ពុជា បានឲ្យវិទ្យុអាស៊ីសេរីដឹងតាមទូរស័ព្ទកាលពីយប់មិញថា ពេលនេះលោកស្រីកំពុងរង់ចាំសេចក្ដីឆ្លើយតបពីខាងតុលាការក្រុង ភ្នំពេញថាតើតុលាការយល់ព្រមឲ្យលោកមេធាវី សុក សំអឿន ដែលបច្ចុប្បន្នជានាយកប្រតិបត្តិក្រុមអ្នកការពារសិទ្ធិកម្ពុជា អាចធ្វើជាមេធាវីការពារក្ដីឲ្យលោកស្រីជំនួសលោកមេធាវី គង់ សំអុន ដែលទើបនឹងលាឈប់លែងការពារក្ដីឲ្យលោកស្រីទៀតនោះ។
លោកស្រី មូរ សុខហួរ បញ្ជាក់ថា លោកស្រីបានដាក់ពាក្យស្នើសុំយកមេធាវីថ្មី លោក សុក សំអឿន ដាក់ជូនទៅតុលាការហើយតាំងពីថ្ងៃសុក្រ ទី៩ ខែកក្កដា ឆ្នាំ២០០៩កន្លងមកថ្មីៗនេះ ៖ «ប៉ុន្តែជាផ្លូវការខ្ញុំមិនទាន់បានទទួលអ្វីពីតុលាការទេ»។
នៅថ្ងៃទី២៤ ខែកក្កដា ឆ្នាំ២០០៩នេះ គឺជាថ្ងៃដែលលោកស្រី មូរ សុខហួរ ត្រូវឡើងតុលាការក្រុងដើម្បីបំភ្លឺតបចំពោះការចោទប្រកាន់របស់លោក ហ៊ុន សែន នាយករដ្ឋមន្ត្រីនៃប្រទេសកម្ពុជា ពីបទបរិហារកេរ្តិ៍លោក។
លោកស្រី មូរ សុខហួរ មានប្រសាសន៍បង្ហាញជំហរក្នុងការឡើងតុលាការនោះថា លោកស្រីមិនរត់គេចជាដាច់ខាត ៖ «ខ្ញុំ ចង់ឲ្យបងប្អូនប្រជាពលរដ្ឋជឿជាក់ថា ខ្ញុំធ្វើនេះមិនមែនចង់ចាញ់ឈ្នះសម្ដេចនាយកទេ ខ្ញុំចង់ឲ្យមានកិត្តិយសខ្ញុំជាស្ត្រី ហើយជាស្ត្រីខ្មែរ ហើយជាអ្នកតំណាងរាស្ត្រ ហើយខ្ញុំចង់ឲ្យឃើញថា ប្រទេសកម្ពុជាយើងពិតជាប្រទេសមួយដែលមានច្បាប់ ដែលអនុវត្តច្បាប់ដោយអត់មានការបង្ខិតបង្ខំ ហើយខ្ញុំចង់ឲ្យឃើញតុលាការខ្មែរ ត្រូវជាតុលាការមួយដែលឯករាជ្យដើម្បីផ្ដល់យុត្តិធម៌ដល់ជនរងគ្រោះ មិនត្រឹមតែខ្ញុំជាអ្នកតំណាងរាស្ត្រទេ គឺដើម្បីប្រជាពលរដ្ឋទាំងអស់»។
សូមរំឭកជូនថា ភាគីលោក ហ៊ុន សែន បានដាក់បណ្ដឹងពីបទបរិហារកេរ្តិ៍ប្រឆាំងនឹងលោកស្រី មូរ សុខហួរ កាលពីថ្ងៃទី២៧ ខែមេសា ឆ្នាំ២០០៩ ដាក់ប្ដឹងក្នុងថ្ងៃដែលលោកស្រី មូរ សុខហួរ ក៏បានដាក់ប្ដឹងលោក ហ៊ុន សែន វិញដែរ ពីបទបរិហារកេរ្តិ៍ប្រឆាំងនឹងលោកនាយករដ្ឋមន្ត្រី។
តែករណីបណ្ដឹងរបស់លោកស្រី មូរ សុខហួរ ប្រឆាំងនឹងលោក ហ៊ុន សែន គឺលោកស្រីបានគ្រោងធ្វើមុនករណីបណ្ដឹងរបស់លោក ហ៊ុន សែន គឺលោកស្រីគ្រោងតាំងពីថ្ងៃទី២៣ ខែមេសា ឆ្នាំ២០០៩មកម៉្លេះ ប៉ុន្តែលុះដល់ថ្ងៃទី១០ ខែមិថុនា ឆ្នាំ២០០៩ ខែមុននេះ ព្រះរាជអាជ្ញាតុលាការក្រុងភ្នំពេញបានសម្រេចតម្កល់សំណុំរឿងនៃ បណ្ដឹងរបស់លោកស្រី មូរ សុខហួរ មិនព្រមចាត់ការ ប៉ុន្តែតុលាការក្រុងបែរជាបន្តចាត់ការក្ដីតាមបណ្ដឹងរបស់លោក ហ៊ុន សែន៕
From:
ไม่มีความคิดเห็น:
แสดงความคิดเห็น